IMA-in health emergency puang turin Kerala hrilh

Indian Medical Asso-ciation (IMA) chuan Kerala sorkar chu lehkha thawnin, an state chhunga Covid-19 hri kai an pun chak avangin health emergency puang turin a ti.

Kerala chief minister Pinarayi Vijaya chuan Thawhlehni khan October thla laihawlah chuan, an state-ah Covid-19 kai thar nitin mi 15,000 an tling thei dawn niin a sawi. Hei vang hian an state-a cheng mipuite chu fimkhur hle turin a chah a ni.

IMA-in Kerala sorkar hnena lehkha a thawnah hian state sorkar chu khauh taka hma la turin a hriattir a, kut silfai ṭhat, sanitiser hman, hmaituamna hman leh physical distancing dan te zawm ṭha hle turin leh, heng te hi state sorkar chu khauh taka tur kengkawh turin a hriattir a ni. Hri kai an pun zel avangin state sorkar chu health emergency puang mai turin IMA chuan a hriattir bawk a, health emergency vang hian an state dinhmun chu a ziaawm phah theih an rin thu IMA chuan a tarlang.

IMA hian a tam thei ang berin test nei turin Kerala sorkar chu a hriattir a, mipui punkhawmna leh kalkhawm theihna zawng zawng chu titawp rih turin a hriattir bawk. Phalna nei lo chu in aṭanga chhuah khap turin a ti bawk a, mipui te pawhin hri leng chhung hi chuan an ṭhianṭhate leh chhungkhat laina hnaite hmu rih lo turin IMA chuan Kerala state sorkar hnenah thurawn a pe.

Heng bakah hian kum lama upa zawkte chu loh theih loh thilah lo chuan pawn chhuak lo se tiin IMA chuan thurawn a pe  a, naupang kum 10 hnuai lam chhuah khap se an duh thu a tarlang bawk. 

State chhunga sorkar leh private damdawi-ina khum, health emergency leh ventilator awm zat leh an la awm lohna data te chu mipuite hriata tarlang ṭhin turin IMA chuan Kerala sorkar a chah bawk a ni.