Rahul Gandhi thlawp nan Congress-in 'maun satyagraha' huaihawt dawn

Congress party chuan Gujarat High Courrt-in an party hruaitu, Rahul Gandhi appeal-na a hnawlsak vangin, July 12 hian state tina Congress headquarters-a Gandhi lim hmaah Rahul Gandhi thlawpna lantir nan maun satyagraha (silent protest) an nei dawn tih an puang.

Congress general secretary (organisation) K C Venugopal chuan state tina an party hruaitute hnenah lehkha thawnin nawrh an huaihawt tur hi a hriattir a, Congress chauh ni lo, India ram pum hian Rahul Gandhi dik lo taka puh leh thiam loh chantir a, bantir a ni hi an dem a, he inbeihnaah hian Rahul-a lam an ṭang tlat a ni, a ti.

Venugopal chuan Rahul Gandhi hian Modi leh Adani inzawmna tenawm tak a phawrh chhuah bakah, mipuite'n thudik an hriat theih nan nasa takin hma a la bawk a, chu chu khawvel pum hian a hre tawh a ni. Thudik hai chhuak tura a beihna kawngah hian dik lo taka puh leh thiam loh chantir niin, Lok Sabha member a nhna aṭang hial ban a nih phah ta a ni tiin a sawi.

"Tunah hian Gandhi-a hma lakna chhunzawm hi kan hna a ni ta a, kan ṭanrual a kan beih let a ngai. Gandhi hi a mal ṭan lo a, Congress leh Congress lo pawh, India ram mipui zawng zawng hian kan party ṭanna lam dah ṭhain thudik leh rorelna dik kan duhna lantir nan he mauna satyagraha hi kan huaihawt dawn a ni," a ti.

Intihmingchhiat thubuaia thiam loh chantir a nih hnua a hremna stay tura Gandhi dilna hi Justice hemant Prachchhak chuan thubuai 10 nei lai a ni tiin a lo hnawlsak a, court hniam zawkin hremna a pek hi a dik a, a felfai a, dan dik tak a ni tiin a ṭang a ni. Gujarat aṭanga BJP MLA, Purnesh Modi thubuai theh luh bawhzuiin, March 23 khan Surat-a metropolitan magistrate court chuan Rahul Gandhi hi IPC section 123 leh 500 (intihhmingchhiat) thubuaiah thiam loh chantirin, kum hnih jail tang turin a hrem a ni.