Hmeichhiate thubuai ngaihtuahna tur bik court din dawn

Sorkar laipui chuan hmeichhiate chunga hleihlenna, kut inthlakna thleng ṭhin leh ro chungchanga thubuai ngaihtuahna tur bik court a din dawn tih a puang.

Hmeichhe pual court dinna tur cheme hnuaia state tina court kalphung tur leh kal dan tur (Standard Operating Procedure) mumal tak duanna chu kar thar lamah tihchhuah tum a ni. Hmeichhe court bik hman tur hi August thla aṭangin Assam leh Jammu and Kashmir-a khaw 50-ah en chhin chhoh a ni ang a, chumi hnuah ram pum huapa kalpui a ni ang.

Hmeichhe court/Nari Adaalat hi khaw tinah member pasarih aṭanga pakua awmna tura ruahman a ni a, member zahve hi gram panchayat-a thlan tlin khawtlang hruaitute an ni ang a, a bak hi khaw mite thlan chhuah, khawtlanga hmeichhe zirtirtu, doctor leh social worker-te'n an hnawh khat ang. Hmeichhe court hian mimal thubuai chauh ngaihtuah loin, sorkar laipui scheme mipui hriat tura puanzarna kawngah hma a la bawk ang a, khawtlanga hmeichhia, ṭanpui leh ngaihsak ngai apiangte tan a ding bawk ang.

Gram panchayat hian hmeichhe court member (Nyaya Sakhis) turte hi a ruat emaw rawtna a siam ang a, hruaitu tu, Mukhya Nyaya Sakhi pawh Nyaya Sakhis aṭangin hian thlan tur a ni ang. Hruaitu term hi thla ruk a ni anga, thla ruk hnuah inthlan ṭhat zel tur a ni. He scheme hi Ministry of Women and Child Development te'n hmeichhe tihchakna leh himna lam ngaihtuah tura a din, Sambal sub-scheme of Mission Shakti chuan an kut ken ang.