West Bengal-a Panchayat inthlan kaihhnawihah mi 11 thi tawh

West Bengal-a Panchayat inthlan kaihhnawiha hmun hrang hrangah buaina chhuakin mi 11-in nunna an chan tawh.

Nunna chan zingah hian Trinamool party mi paruk leh, BJP, Left party, Congress leh Indian Secular Front (ISF) party mi pakhat ṭheuh bakah, eng party mi nge hriat theih loh pakhat a tel bawk a ni. Nunna chan bakah hian buaina chhuahna hmun tam takah hliam eng emaw zat an awm a, hmun ṭhenkhatah chuan ballot box tihchhiatte a awm bawk a ni. Buaina chhuah chungchangah hian Trinamool Congress chuan venhim lam hna thawktu, central sorkar tirh sipaite chu an hna an hlen tawk loh avanga dem tur an nih thu an sawi.

Trinamool Congress general secretary, Abhishek Banerjee chuan,"BJP hian central sipaite ni loin mipuite hian vote an thlak a ni tih an theihnghilh a ni. BJP hian mipui thlawpna an hmuh loh chuan central sipai eng zat pawh lo tir se thil thlen dan ngai reng hian a thleng tho ang," tiin a sawi.

Bengal-a panchayat inthlanah nimin zing dar 7 aṭang khan vote thlak ṭan a ni a, gram panchayat seat 63,229, panchayat samiti seat 9,730 leh zilla parishad-a seat 928, a vaia seat 73,887 awm chu candidate nuai 2 leh sangrukte'n inchuhin, mipui vbc. 5.67 te'n an thlang dawn a ni.