Ruah sur nasain India hmar lamah harsatna thlen; Ni 3 chhungin mi 19-in nunna an chan

India hmar lam state ṭhenkhatah tun hnaiah ruah nasa takin a sur a, ni thum chhungin mi 19-in nunna an chan phah tawh a ni.

Hmar lam state zingah Himachal Pradesh chuan ruah sur hi an tuar nasa zual a, chawl loa ruah a sur reng avangin tui a lian nasa a, in bakah thil tam tak a tichhe tawh. Manali, Kullu, Kinnaur leh Chamba-ah te chuan tuilianin dawr leh lirthei a lakte a awm a, mihring nunphung a tikhaihlak nasa hle. Heng khuate hi lui lian; Ravi, Beas, Sutlej leh Chenab kama awmte an ni a, lui tui lian an tuar nasa hle a ni.

Weather department-te chuan ni eng emaw zah chhung chu Himachal Pradesh, Uttarakhand, Punjab, Haryana, Jammu and Kashmir, Rajasthan, Delhi leh a chhehvelah ruah hi a la sur chhunzawm dawn niin an sawi.

Gurgaon leh Delhi-ah chuan tui a tlin nasat avangin nimin khan school zawng zawng khar a ni bawk a, Gurgaon district-ah chuan thuneitute'n mahni in lam aṭanga hna thawk turin thu an chhuah a ni.

Delhi sorkar chuan Haryana-in Hathnikund tuikhuah chu Yamuna-a an sah luh avangin tuilian thlen hlauhawmna vil turin control room 16 zet a siam. Delhi Chief Minister Arvind Kejriwal chuan khaw chhunga tui tling nasa leh Yamuna lui chim chin sang zel chungchang ngaihtuah a, hmalak dan tur rel turin high-level meeting a ko bawk.

Rajasthan, Punjab leh Haryana-a ruah sur nasain khaw chhung hmun tam tak chu tuiin a chim a, thuneitute pawhin hma lak dan tur ngaihtuahin tuilian nasatna hmunte chu an tlawh bawk a ni.

Jammu & Kashmir-a Kathua leh Samba district-ah red alert tihchhuah a ni a hetih lai hian ni thum zet an chawlh hnuah Panjtarni leh Sheshnag base camp-a Amarnath Yatra hmang turte chuan an kalkawng an chhunzawm ve leh bawk.

Indian Meteorological Department (IMD) chuan fur thli leh khawthlang lama ruah sur a intawh avangin India hmar thlang lamah hian ruah a sur nasat phah niin an sawi.