Punjab Deputy Chief Minister hlui man a ni

Punjab Deputy Chief Minister hlui, OP Soni chu a sum lak luh leh a thil neih inthlau lutuka puhna chungchangah man a ni.

Soni hi nimin khan Special Investigation and Vigilance Bureau (SIVB) office-ah a inlan a, thu zawh fiah a nih hnuin man a ni. Kum 2017-2022 inkara a sum lak luh dan kimchangte chhui chian a ni ang.

Dy. CM hlui hi a sum lak luh phu loa hausaa puh a nih chungchangah hian SIVB chuan Prevention of Corruption Act-a sections 13(1)(b) leh 13(2) hnuaiah Pathianni khan FIR theh luh a ni tih Vigilance Bureau thupuangtu chuan a sawi.

April 1, 2016 leh March 31, 2022 inkar khan Soni leh a chhungte sum lak luh hi Rs. 45,218,771 a ni a, an sum hman chhuah erawh chu Rs. 124,842,692 a tling thung. A sum lak luh aia a hman chhuah tamna hi 176% a tling hial a ni. Hemi hun chhung hian Soni hi a nupui Sumen Soni leh a fapa, Raghav Soni te hminga property investment tia puh a ni.

Kum 2021-a Punjab Chief Minister atana Charanjit Singh Channi lak luh a nih khan OP Soni hi Deputy Chief Minister-ah ruat a ni.