Surat International airport-ah DRI-in rangkachak Rs. vbc 25 man hu man

Directorate of Revenue Intelligence (DRI) chuan July 9 khan Gujarat-a Surat International airport-ah rangkachak kg 48.2 an man a, heng rangkachakte hi Rs. vbc 25 man hu niin an sawi. He thil kaihhnawihah hian Sharjah aṭanga lo kal passenger pathum leh airport official pakhat an man bawk.

DRI chuan thuchhuah siamin, "DRI officer-te chuan Air India Express, flight no. IX172, July 7-a Sharjah aṭanga Surat International airport-a lo kal passenger pathumte chu kan lo man a, thu kan dawn angin heng mite hi rangkachak tawlh ruk tum nia hriat an ni," a ti.

Rangkachak (Gold paste) hi tihphek vek niin; DRI-te hian rangkachak kg 43.5 hi packet var te 20-ah an hmu a, heng packet-te hi passenger-te hian an baggage-a belt chhungah an thun a ni. Rangkachak kg 4.67 te erawh chu immigration checkpoint bula mipa zun inah an kal san a, hei hi CISF-te'n DRI-te kutah an hlan a ni. Rangkachak man zawng zawng hi kg 48.2 a tling.

Heng rangkachak tawlh ruk tum mi pathumte hi Surat International airport-a thawk official pakhat chuan a pui niin hriat a ni a, screening leh checkpoint paltlang hmaa airport-a inthiarna pindanah inhlan fel an tum niin DRI chuan an sawi.