Karnataka-in State Education Policy zawk an hmang dawn

Karnataka primary education minister, Madhu Bangarappa chuan state chuan National Education Policy (NEP) hmang loin, State Education Policy (SEP) zawk an hmang dawn tih a sawi.

Inrinni liam taa Bengaluru-a model government Primary School a tlawh ṭumin Minister chuan he thu hi a sawi a ni. "Education department chuan kan state tan State Education Policy (SEP) a duang ang. Mi thiamte thurawn angin SEP hi kan hmang dawn a ni," a ti.

He thu a sawi hma ni hian Karnataka Chief Minister Siddaramaiah chuan budget speech a neihah a kaihhruai sorkarin NEP an hman loh tur thu leh, an state mihring mila education policy hran an duan tur thu hi a lo sawi tawh a ni."Central-in education policy a duan hi thuneihna insem dan phung kalh a ni a, India anga mihring chi hrang hrang tam lutuk chennaah chuan a hman tlak loh a ni. India anga sakhua, ṭawng leh hnam nunphung chi hrang tam lutukah hian zirna kalphung inang khat hman hi thil theih a ni lo, an duan dan hrim hrim hian India danpui leh democracy a kalh bawk," tiin a sawi.

Karnataka transport minister Ramalinga Reddy pawhin NEP hi sawiselin,"NEP hi a khingbai. Thlirna pakhat chauh hmanga siam a ni. Democracy ram kan ni a, sakhua tam tak kan awm bawk a, NEP hi a ṭha ka ti thei lo. Kan state hman tur chu a hranin kan duang mai ang," tiin a lo sawi ve bawk.