Mi 437 banna stay turin Delhi sorkarin a ngen: Supreme Court-in July 17-ah ngaihtuah dawn

Delhi Legislative Assembly-a mimal anga hnathawka chhawr lai mi 437 te chu Delhi Lt. Governor-in a ban hnuah, Delhi sorkar chuan banna order stay turin Supreme Court-ah a dil. Court chuan July 17-ah a ngaihtuah tur thu a sawi.

Sorkar aiawha ding, senior advocate A.M. Singhvi leh advocate Shadaan Farsat-te chuan Chief Justice of India(CJI) DY Chandrachud hnenah, sorkar laipuiin ordinance a pass avangin Governor hian heng hnathawkte banna thu chhuah ve mai a nih thu an sawi.

Mi 437-te banna stay tura ngenna hi Delhi-a sorkar lai AAP chuan a theh lut a, hei hi sorkar laipuiin National Capital Territory of Delhi (Amendment) Ordinance, 2023 a siam dodalna kalpuina kawng khat a ni nghal dawn a ni, an ti. Singhvi chuan,"An hlawh tihtawp sak nghal niin, hna pawh an thawk chhunzawm lo a ni. Ordinance denchhena ban an ni hi thil dik a ni lo," a ti.

Sorkar laipui aiawh, solicitor general Tushar Mehta chuan Singhvi thusawi hi hnialin, Assembly-a an chhawr tam zawkte hi party mi leh sa an ni, a ṭhen phei chu MLA nupuite pawh an awm, tiin a sawi thung.