Dan pawna hnawl pawl tihnun leh tumtu mi 10 man

Jammu & Kashmir police-te chuan dan pawna hnawl tawh, Jammu Kashmir Liberation Front (JKLF) leh Hurriyat din thar leh tumtu nia puh mi 10 an man.

Heng an mi mante hi Unlawful Activities Prevention Act hnuaia section 10 leh 13 bakah, Indian Penal Code (IPC) section 121A hmangtein Kothibagh police station-ah thubuai siamsak an ni tih J&K police-te chuan an sawi.

Police-te chuan an mi mante hi India ram pawn lama aṭanga thu an hmuh anga che an ni an ti a, a ṭhente chu Farooq Siddiqui kaihhruai inṭhen darh duh pawl, Kashmir Global Council leh Raja Muzaffer kaihhruai, JKLF member-te an nih thu an sawi. An chhui chianna aṭanga an hriat danin heng mite hian pawl tihnun leh tum hian meeting an lo nei tawh a, June 13 khan tuna an thil tum bul ṭan nan hian inhmuh khawmna hmasa an lo nei tawh bawk. Police-te chuan he thil chungchang hi an chhui zui zel tur thu leh man belh pawh an la neih an rin thu an tarlang.