Karnataka sorkarin 'Anna Bhagya' scheme hnuaiah pawisa sem ṭan

Karnataka chief minister Siddaramaiah chuan Thawhṭanni khan Anna Bhagya scheme hnuaia Direct Beneficiary Transfer (DBT) chu hawngin, he scheme-in a huamte chu sorkarin buhfai kg 5 aiah Rs. 170 zel an account-ah a thunsak ṭan thu a sawi.

Karnataka-a Congress sorkar hian inthlan hmaa an thutiamah Anna Bhagya scheme kaltlanga BPL chhungkuate hnenah thla tin buhfai kg 5 a thlawna an pek belh tur hi an telh a ni.

Mahse National Food Security Act hnuaia state-in buhfai an dawn tur bakah kg 5 dawn belh tura Karnataka sorkarin an dilna, sorkar laipuiin open market-a state tana buhfai lei belh theihna tur titawpa a lo dan tak si avangin buhfai aiah a sum fai hian an sem ta ni. He scheme hnuaiah hian BPL card-a chuang, chhungkaw member tinte chuan, Food Corporation of India (FCI) chhut dan anga chhutin (Rs. 34 per kg), buhfai kg 5 leina daih Rs. 170 hi thla tin an dawng dawn a ni.

Siddaramaiah chuan sorkar laipui chu sawisel zuiin, buhfai an pek belh duh lo chu Karnataka mipuite tana buhfai pe duh lo a ni tiin, BJP chu mi retheite beitu a ni, a ti. A thlawna buhfai pe tura an dil loh thu leh state sorkar suma buhfai lei belh dil an nih thu a sawi bawk.