SC-in ED Director term pawhsei dan chu dan kalh tih sawi

Supreme Court chuan Enforcement Directorate (ED) director Sanjay Kumar Mishra term pawhsei a nih danah, kum 2021-a court thutlukna lo siam tawh bawhchhiat a nih avangin dan kalh a ni tih Thawhlehni khan a sawi.

ED Director term hi November 2021-a tawp tawh tur a nih laiin sorkar laipui chuan vawiin thlengin a ruai a ni. Court chuan hei hi dan kalh a nih thu a sawi a, hemi rual hian sorkar laipui ngenna angin July 31 thleng a ngaihhnathiam dawn a ni.

SC chuan thupek a tichhuahah, Supreme Court thutlukna siam a nih tawh hnua Sanjay Kumar Mishra rawih nawn leh hi dan kalh a ni a, mahse, July 31 thleng a nihna hi chelh chhunzawm phalsak a ni ang, tiin SC division bench-in 2021-a thutlukna a siam tawh chu zawm a nih loh thu a tarlang.

Kumin March thla khan senior advocate KV Viswanathan chuan ED Director Mishra term pawhsei a nih chungchangah Supreme Court-ah petition hi a theh lut a ni. Justice BR Gavai leh Aravind Kumar awmna bench hnenah, petition a theh luh chhan chu Mishra a nih avang ni loin, ED Director term an pawhsei dan kalphung hrim hrim zawk hi a dik lo a ni, a ti.

Kum 2021-a court thutlukna siamah Mishra term hi November 2021 thleng bak pawhsei tawh loh tur tih a ni. Thutluknaah hian chhan ṭha bik thil avang lo chuan pawhsei loh tur a intih kher avangin tun thila Mishra term pawhsei sak a nih chhan hi a dik tawh lo a ni, tiin Viswanathan chuan a sawi.

Mishra hi kum 2018 November-ah khan kum hnih chhung atana ED Director ni turin rawih a ni a, a term hi November 2020 khan zo tawhin, May 2020 khan kum 60 a tling tawh bawk.