Yamuna luiin kum 10 chhunga a chim san ber lai a thleng

Ruah sur nasa avangin Yamuna lui tui chim chin a san belh zel a, Central Water Commission (CWC) flood monitoring portal chuan Old Delhi-a rel kawng hlui lei zawna lui tui chuan Nilaini khan metre 207-a sang a nih tawh thu a tarlang.

Nilaini zing dar 4-a an tehnaah chuan Yamuna lui chim chin hian metre 207 tlingin, dar 10:45- ah chuan metre 207.37 a ni leh tawh. Yamuna luiin kum 10 hnu, 2013 hnua metre 207-a sang a chim leh hmasak ber niin, a san ber lai erawh chuan metre 207.49 a lo ni tawh a ni.

ITO Chhat Ghat an tih chu tui hian a chim vek tawh a, ṭhutna an siamte pawh tui hian a chim pil vek tawh bawk. Lui tui chim chin hi nimin tlai lam khan a san belh chhunzawm dawn niin irrigation and flood control department chuan an sawi a, tuilian a thlen hlauhna a nasa sawt hle. Nikum September thla khan Yamuna lui hian ṭum hnih hlauhawm chhinchhiahna hi a lo pel tawh bawk.

Irrigation and flood control department chuan Thawhlehni tlai khan thuchhuah siamin, "Thawhṭanni zan khan lui tui san zawng hian a him chin a pel tawh a, tuilen theihna hmuna chengte hmun him lama sawn chhuah hna pawh thawh ṭan a ni tawh. Hmun hniam laia chengte pawh hmun sang lamah sawn an ni," tiin an tarlang. A ṭul huna hman turin lawng 45 chhawp a ni a, NGO-te chu an chenna hmun aṭanga sawn chhuahte chhawmdawl hna thawhnaa pui turin ngen an ni bawk.