West Bengal panchayat inthlanah Trinamool sang fal

West Bengal-a Panchayat inthlan neih zawh takah vote tlate chu Thawhlehni aṭang khan chhiar a ni a, result kimchang la hriat loh mah se Trinamool Congress (TMC) chu midangte um phak theih loh turin an sang fal tawh.

Inthlan hi Gram panchayat seat 63,229, panchayat samiti seat 9,730 leh zilla parishad seat 928, a vaiin seat 73,887-ah neih a ni. Result hriat theih chinah TMC hian gram panachayat seat 34,359 la tawhin, a hnaih bertu BJP chuan seat 9,545 a la tawh. CPI(M) chuan seat 2,885 lain Congress-in seat 2,498 a la tawh bawk.

Panchayati samiti-ah TMC hian seat 6,134 la tawhin, BJP-in 939, CPI(M)-in 165 leh Congress-in seat 244 an la tawh bawk a ni. Zilla Parishad-a seat 928 awmah TMC-in seat 554, BJP-in 19, CPI(M) seat 2 leh Congress-in seat 4 a la tawh bawk.

Bengal panchayat inthlana hnehna an chan chhoh mek lai hian chief minister Mamata Banerjee chuan Facebook-ah post siamin,"Bengal-ah chuan TMC hlir a ni. Bengal mipuite chungah TMC an duhsakna leh rinna avangin lawmthu ka sawi duh a, he inthlan hian Bengal mipuite thinlungah TMC chauhin hmun a chang a ni tih a lantir a ni," tiin a sawi.

Bengal-a panchayat inthlan hi July 8, Inrinni khan neih ṭan a ni a, Thawhṭanni thleng khan booth 696-ah vote thlak a la ni.Hriat theih chinah inthlan kaihhnawiha buaina chhuakah hian mi 40 an thi tawh. TMC chuan mitthi zinga 60% chu an party mi leh sa leh TMC ṭantu an ni tih an sawi a ni.