Eptu party-te July 17-ah inhmu khawm leh dawn

Eptu party intel khawmte'n June 23-ah Patna-a meeting hlawhtling tak an neih hnuin July 17-18 chhung hian Bengaluru-ah a vawi hnih nan meeting neih leh an tum. He hunah hian party dang pariatin an tel ve dawn tih sawiin, meeting-a hian party 24 an tel tawh dawn a ni.

2024 Lok Sabha inthlan chuhhoa, BJP sorkar paihthlak ngei tuma intel khawm eptute hian meeting an neih tur thu hi an tichiang tawh a, Karnataka-a Congress sorkar chuan meeting hi a thleng dawn a ni. Party tel sa bakah Marumalarchi Dravida Munnetra Kazhagam (MDMK), Kongu Desa Makkal Katchi (KDMK), Viduthalai Chiruthaigal Katchi (VCK), Revolutionary Socialist Party (RSP), All India Forward Bloc, Indian Union Muslim League (IUML), Kerala Congress (Joseph), leh Kerala Congress (Mani) te chu an tel belh dawn niin an sawi. KDMK leh MDMK te hi 2014 inthlana BJP thawhpui ṭhinte an ni.

Congress President leh Opposition leader ni bawk, Mallikarjun Kharge chuan eptu party hruaitute chu meeting-a tel ngei tur hian a sawm a, Congress parliamentary party chairperson, Sonia Gandhi pawh a tel dawn tih a sawi bawk.