Yamuna tuilianin Delhi khawpui a tibuai tan; Khawpui chhunga school zawng zawng khar a ni

Yamuna lui chim chin chu a sang zel a, nimin zing dar 7 khan metre 208.46 ni tawhin Delhi-a kawngpui tam zawk leh in thenkhat chu tuilian hian a chim a, hmun ṭhenkhatah chuan tui hian car-te a chim pil. Khawpui chhunga sorkar school leh private school zawng zawng pawh khar an ni.

Tuilian avang hian tui tihthianghlimna hmun pathum chu khar a ni a, hei hian Delhi-ah tui thianghlim in turah harsatna a thlen rin a ni. Delhi chief minister Arvind Kejriwal chenna leh Delhi Assembly house aṭanga metre 500 vel leka hlaa awm, Civil Line-a Ring Road chu tuilian hian a chim nasa hle a, Majnu ka Tila leh ISTB Kashmiri gate inkar kawng pawh khar rih a ni bawk.

Delhi-a AAP sorkar chuan sorkar laipui chu hmalak dan tur ngaihtuah pui turin a ngen a, tuilian chu Delhi hmar lama tui khuah an sah vang nia sawiin, hei hi titawp turin a ngen a ni. Sorkar laipui erawh chuan tui khuah chu sah a ṭul thu leh, ruah sur nasa avanga tui khuah aṭanga tui a liam nasat hrim hrim thu a sawi thung. Delhi-ah hian ni eng emaw ti chhung chu ruah a sur tawh lo a, mahse, Haryana aṭanga tuikhuah an sah hian Yamuna lui tui a letin a tihtam phah a, lui kam leh a bul hnaia chengte tan harsatna a siam phah a ni. Central Water Commission chuan Haryana tui khuah atanga tui chhuak chu nimin dar 2 vel aṭang khan a tlem chho turah an ngai a ni.

Delhi CM Kejriwal chuan thuchhuah siamin, tui tlin nasatna hmuna chengte sawn chhuah hna an thawh ṭan dawn thu a sawi a, ṭanpuina hna an thawhna kawngah mipuite chu thu awih turin a chah bawk. Kejriwal chuan,"Nunna chhanhim a pawimawh hmasa ber a, he harsatna karah hian Delhi mipuite inṭanpui tawn ṭheuh turin ka ngen che u a ni," a ti.

National Disaster Response Force team 12 te chu chhanchhuah hna thawk turin Delhi-ah hian an awm mek. Mi tam takin tui lut avangin an in an chhuah san tawh. Delhi-ah hian pun khawm lam chi reng reng khap a ni bawk.

Yamuna hian a chim san ber lai a tawng mek a, tun fur lai hi kum 10 chhunga Delhi-in ruah tui a dawn nasat ber ṭum a ni bawk a ni.