PM Modi-a'n France leh UAE tlawh dawn

Prime Minister Narendra Modi chuan ni thum chama France leh UAE tlawh turin nimin khan India a chhuah san.

France President Emmanuel Macron sawmna angin PM Modi hian July 13 leh 14 hian France a tlawh ang a, July 15 hian UAE a tlawh leh bawk ang.

French National day/Bastille Day lawmnaah Modi hi Guest of Honour atan sawm a ni a, India tri-service contingent-te pawh he hunah hian an tel ve dawn a ni. Frane rama a cham chhungin President Macron bakah, prime minister Elisabeth Borne, President of National Assembly Yael Braun-Pivet leh Presidents of the Senate-te a hmu dawn a ni. President Macron hian Bastille Day-ah hian Modi pualin Louvre Museum-ah state banquet a buatsaih dawn bawk.

France a tlawh zawhah hian Modi hi President HH Sheikh Mohammed bin Zayed Al Nahyan hmu turin UAE-ah a kal leh dawn a, tun hnaia UAE a lo tlawh tawh aṭangin ram pahnihte inzawmna dinhmun hi a tha leh zual niin a sawi. Nikum khan Germany-a G7 summit a nei zawhah Modi hian UAE hi a lo tlawh tawh a, ram venhimna kawnga thawh dunna chungchang pawh President Al Nahyan nen hian an lo sawi dun tawh a ni.