Supreme Court-ah Rahul Gandhi kal dawn

Congress party hruaitu, Rahul Gandhi chuan Modi hmingpu tihhmingchhiatna thubuai siamsaka Surat court-in thiam loh a chantirna stay dil turin Supreme Court-ah a kal dawn tih Congress chuan Nilaini khan an sawi.

Ram chhung hmun hrang hranga Pradesh Congress Committee (PCCs) chuan Nilaini khan Rahul Gandhi an thlawpna lantir nan leh, court thutlukna an duh lohna lantir nan 'maun satyagraha' (silent protest) a rualin an nei a, he thubuaiah hian BJP chuan Rahul Gandhi hi dik lo takin an bei a ni, an ti.

Congress thupuangtu Abhishek Singhvi chuan,"Supreme court kal tur hian kan inpuahchah mek a, rei a ni tawh lo ang. Rei lo teah kan hmalaknate in la hre thuai ang," tiin Supreme court an kal tur thu hi a sawi a ni.

Congress general secretary, KC Venugopal pawhin,"Dik lo taka Lok sabha member aṭanga Rahul Gandhi ban a nihna hi ram chhunga party mi leh hruaitu zawng zawngte chuan kan dodal tlat a ni tih kan lantir. BJP thiltih tenawm tak hi kan do zel dawn a, thudik chu a la ding chang ngei ang," tiin a Twitter-ah a tarlang.

A thubuai stay tura Rahul Gandhi dilna hi July 7 khan Gujarat high court chuan a lo hnawlsak tawh a ni. Thiam loh chantir a nih hnuah Lok Sabha member a nihna hlihsak nghal a ni a, hemi hnu hian a bungalow chhuahsanin a nu, Sonia Gandhi inah a cheng lailawk a ni.