PM Modi hnenah France chawimawina sang ber hlan a ni

France rama cham mek, prime minister Narendra Modi chu France civil mi leh military chawimawina sang ber, Grand Cross of the Legion of Honour hlan a ni.

PM Modi hi India mi zingah he chawimawina dawng hmasa ber a ni a, Ningani zan khan Elysee Palace-ah France president Emmanuel Macron-a'n a hlan.

Chawimawina a dawn chungchangah mimala chawimawina an pek rualin India mipuite aiawha a lawm thu Macron hi a hrilh. Grand Cross of the Legion of Honour hi Modi bakah South Africa President hlui Nelson Mandela, King Charles, Germany Chancellor hlui Angela Merkel leh Boutros Boutros-Ghali, UN Secretary General hluite pawhin an lo dawng tawh bawk a ni.

Legion of Honour hi kum 1802-a Napoleon Bonaparte bul ṭan niin, chi hrang panga (A hniam leh sang)-ah ṭhen a ni. An ribbon hman hi a sen niin, badge atan hian Maltese (arsi chi khat) kil nga nei, oak thing leh laurel hnah phiar mawia uai an hmang. He chawimawina hi France mi chauh pek tur tih ni mah se, ram dang mi, France tana thawk emaw France thuthlung zawmpuitute chu pek theih an ni.

Modi hian Ningani khan France hi a thleng a, President Macron-te nupain Elysee Palace-ah private dinner an lo buatsaihsak a ni. Zan lamah France-a India mi awmte hmaah thu sawiin France-a UPI hman theih tura inremna neih a nih tawh thu a sawi. Kal khawmte hmaah hian Modi chuan Marseille-a India consulate thar din a nih tur thu a sawi bakah India aṭanga Europe rama Master zirlaite chu an zir zawh hnuaah kum nga daih, work-visa pek an nih ṭhin tur thu a sawi bawk.

Modi hi nimina France National Day lawmnaah Guest of Honour a ni.