Thla leilung zir chiang tur Chandrayaan-3 kah chhuah a ni

India-in thla leilung zir chianna tur a tirh vawi thumna ni turin, nimin chawhnu dar 2:35 khan Andhra Pradesh-a Sriharikota aṭangin Chandrayaan-3 a kap chhuak.

Chandrayaan -3 hi tluang taka Thlaa a ṭum thei a nih chuan India chu Thlaa ṭum thei ram palina a ni ang. Chandrayaan-3 hi Thla leilunga tui molecule pawh an lo hmuh tawhna, chhim tawp lamah ṭum a tum dawn a, tui molecule pawh hi India vekin Chandrayaan -1, kum 2008-a a kah chhuah aṭanga hmuh a ni.

Chandrayaan-3 hi moon lander, Vikram an tihah dahin, hei hi, GSLV Mark 3 heavy lift launch vehicle, bahubali rocket an tih bawkah nghah a ni. GSLV hi meter 43.5 a sang niin, Qutub Minar chanve ang vela sang niin an sawi a, a hming pawh Launch Vehicle Mark 3 (LVM-3) tiin an thlak a ni. Thla leilunga ṭum nan hian ni 40 vel hmang tura ngaih a ni a, August 23-a ṭum thei tura beisei a ni.

Vikram hi him leh ṭha taka a ṭum a nih chuan lirthei vak kual tur (Rover) Pragyan chu a chhuahtir ang a, Thla leilung lunar day, khawvel hun chhiarah chuan ni 14 chhung thil chi hrang hrang zirin a tlan kual dawn a ni. Scientist-te chuan Thla lei an zir chian theih an beisei bakah Thlaa leilung nghing ṭhin an zir belh theih an beisei thu an sawi.

ISRO chuan an lo tihsual tawh aṭanga an inzir thiam tawh thu sawiin, engkim an en chhin nasat bakah software update leh engine panga aṭanga palia tihtlemte chu an hmasawnna langsar a nih thu an sawi. 2019 khan Chandrayaan-2 chu harsatna a tawh avangin a ṭumna hmunah an ṭumtir thei lo a ni.