Tuilianin Delhi-a kawng lun ber a chim tawh

Yamuna lui lian zel kara tui chhe paihna regulator pakhat a chhiat tel bawk avangin, Delhi-a kawngpui lun lai ber leh traffic nasat berna hmun, ITO crossing chu tuilianin a chim.

Delhi chief minister Arvind Kejriwal chuan nimin khan regulator chhia chu thuneitute hriattir an nih tawh thu leh, a ṭul chuan Army leh disaster relief force-te pawh pun turin a hrilh tawh thu a sawi. Kejriwal chuan,"ITO leh a chhehvela tui tling hi drain regulator ṭhat loh vang a ni. Engineer-te'n zankhuain siam ṭhat tumin an bei tawh a. Siam ṭhat vat a ṭul thu Chief Secretary pawh ka hrilh tawh bawk," a ti.

Health minister leh Delhi Jal Board chairman Saurabh Bharadwaj pawhin zan khuaa regulator hi siam tuma beih a nih thu leh, an la siam ṭhat theih loh thu a sawi ve bawk.

Delhi-a Old Railway Bridge velah chuan nimin zing lam khan tui chim chin hi metre 208.40 niin, a hlauhawm chin a thleng hial a ni. Yamuna lui tuilian hian Delhi khaw chhung a chim nasa hle a, Delhi sorkar chuan school, college, ruang halna leh tui tihthianghlimna hmunte chu a khar phah tawh a ni.