Gujarat Home Minister hlui kum 7 tang turin hrem a ni

Gujarat home minister hlui, Vipul Chaudhary chu kum 2014-a Maharashtra hnena dan dik loa bawng chaw hralha puhna thubuaiah thiam loh chantir a nih hnuah, Mehsana court chuan kum 7 tang turin a hrem.

Vipul Chaudhary hi Amul brand neitu, Gujarat Cooperative Milk Marketing Federation (GCMMF) chairman hlui a ni a, Dudhsagar Dairy chairman a ni tawh bawk. Henga chairman a nih lai, kum 2014 khan dan dik loin Maharsahtra-a bawng chaw a pek avangin dairy hian Rs. vbc 22.5 zet a hloh phah a ni. Chaudhary bakah hian he thila inhmahnawiha puh mi dang 14-te pawh kum 7 tang tura hrem an ni bawk.

Public prosecutor, Vijay Barot chuan media-te hmaah thusawiin,"He case, dairy sum tur lo khawih chingpenna kaihhnawihah hian kum 2014 khan thubuai ziah luh a ni tawh a, a tirah mi 22 ni mah se, trial neih laiin mi pathum an thi a ni," tiin a sawi. Chaudhary hi Shankarsinh Vaghela sorkar hnuaiah khan Gujarat cooperative sector-ah Minister a lo ni tawh thin a ni.