Trilateral highway chungchangah Jaishankar-a'n Myanmar Minister hmu

External affairs minister (EAM), S. Jaishankar chuan July 16 khan Myanmar foreign minister Than Swe hmuin, India-Myanmar-Thailand zawm tur trilateral highway chungchang a sawipui. Trilateral highway siam puitlin a nih theihna atana ramri boruak ṭha a pawimawh zia a sawi.

EAM hian Inrinni khan Bangkok a thleng a, Mekong Ganga Cooperation (MGC) mechanism meeting neih hmain Myanmar Foreign Minister nen hian an inkawm a ni.

India, Myanmar leh Thailand zawmtu tur, trilateral highway hi Myanmar boruak tawn mek avangin zawh mai a harsa hle a, sorkar pawhin siam zawh vat a ngaihpawimawh thu sawiin,"Kan zavaia hlawkpui tur kawngpui ṭha nei tura hmalakna awm theite kan sawi ber. MGC meeting-ah pawh hei tho hi kan sawi ang. India-Myanmar-Thailand trilateral highway siam zawh hna hi kan ngaipawimawh tur a ni," tiin a sawi.

Than Swe nen an inkawmnaah hian Jaishankar chuan ramri-ah remna leh muanna a awm a pawimawhzia a sawi a, tun hnaiah boruak tha lo awm zeuh zeuh mah se, boruak tichhe zual thei thilte chu pumpelh zel an duh thu a sawi a ni. Ramri kana dan phal loh thil tih thin, drug leh human trafficking-te pawh thawhhona tha zawk nena an tihreh thuai theih a beisei thu sawi bawk.

India-Myanmar-Thailand trilateral highway hi December 2019-a zawh hman tum tawh kha a ni a, km 1,400 zeta thui kawngpui, South-East Asia ramte nena insumdawn tawnna, zirna leh inenkawlna chungchang bakah, tourism chawi kang tura ram pathumte hmalakna a ni. Highway hi Moreh, Manipur leh Mae Sot, Thailand zawmin Myanmar-ah a kaltlang dawn a, hna hi 70% zawh tawh a ni bawk.