Congress-in state sorkar nek chep zawnga hmalakna dodal

Aaam Aadmi Party (AAP) hruaitu, Arvind Kejriwal-a'n, Delhi-a sorkar laipuiin thuneihna neih tuma thupek a siam thar dodal tura Congress-in an pui a nih loh chuan eptu party meeting-ah an tel theih tawh loh tur thu a sawi hnuah, Congress chuan mipuite thlan tlin state sorkar nek chep zawnga hmalakna reng reng chu an dodal dawn tih an sawi.

Vawiin leh naktuk hian Bengaluru-ah eptu party-te meeting neih leh tum a ni a, he meeting hi Congress chuan a thleng dawn a ni. Meeting-ah hian party 24 tel tura beisei an ni a, heng party zingah hian AAP pawh an chhiar tel thu Congress hian a tarlang.

Sorkar laipui chuan July 20-a ṭan tur, parliament monsoon session-ah National Capital Territory of Delhi (Amendment) Bill 2023 chu sawiho tur zingah a telh. He bill hi Delhi-a AAP sorkar chuan bureaucrarcy kaltlanga Lieutenant Governor hnena thuneihna pe a, a phen aṭanga sorkar laipuiin Delhi rorelna chelh a tumna kawng a ni tiin, bill sawiho a nih hunah pawh eptu party zawng zawngte chu a dodal zawnga ṭangho vek turin a ngen mek a ni.