Ruah sur nasa avangin IMD -in state pangaah orange alert puang

Yamuna lui tui lian chu kam ṭan mah se, Indian Meteorological Department (IMD) chuan Delhi-ah ruah nasa zawk a sur dawn niin a sawi a, hmar lam state ṭhenkhatah pawh orange alert a puang bawk.

Kar hmasa khan Yamuna lui a lian nasa a, lui chim chin a hlauhawm chin thlengin, Delhi leh a chhevelah chuan tuilian an tuar a ni. Hetih lai hian Yamuna lui chu a kam ṭan mek a, tuilian nasa zawk pumpelh tura ngaih a nih laiin, IMD hian nimin khan Delhi, Noida leh Gurugram velah chuan ruah tam tak a sur leh dawn niin a sawi.

IMD chuan Maharashtra, Rajasthan, Madhya Pradesh, Uttarakhand leh Himachal Pradesh-ahte chuan darkar 24 chhungin ruah nasa tak sur turin a sawi. Chhim lam state, Karnataka, Kerala leh Andhra Pradesh-ah ni thum chhunga ruah nasa tak sur thei dinhmunah a din thu an sawi bawk. Himachal Pradesh-ah chuan chawlh awm loa ni nga chhung ruah a la sur chhunzawm tur thu an sawi a, ruah sur nasa tuar mek Uttarakhand-ah pawh darkar 24 chhungin ruah nasa zawk a la sur belh dawn bawk a ni a ti.

IMD hian Maharashtra-ah pawh orange alert puangin, ni 5 chhunga ruah nasa tak thleng tur angin an sawi. Rajasthan chhak lamah pawh ni 3 chhung la sur chhunzawm tur angin an sawi bawk.