Bengaluru-ah eptu party-te'n meeting nei

Ram chhunga eptu party hrang hrangte chuan 2024 Lok sabha inthlan lo awm tur atana an thawhho dan tur ngaihtuahin nimin khan Bengaluru-ah meeting an nei leh a, vawiinah an chhunzawm ang.

Eptu party-te hian meeting hi vawi hnih an neihna tur niin, June 23, khan Patna-ah an lo nei tawh a ni. Tun ṭum meeting-ah hian eptu party 26 an tel. Delhi-a sorkar laipui ordinance siam duh loa party dang thlawpna zawng mek, AAP pawhin Congress-in an thlawp thu an sawi hnuah meeting an tel tur thu hi an sawi a ni.

Meeting-ah hian party hrang hrangte'n manifesto inṭawm an neih theih tur lo siam tur sub-committee din chungchang te, eptu party-te thawhhona tur atana inremna ṭha zawk leh an thawhhona hming tur te an sawiho ang.

Meeting thlengtu Bengaluru-a Congress sorkar chuan 'United we stand' tih thupui hmangin eptu party hruaitute hi an lo lawm a ni.

Congress general secretary, KC. Venugopal chuan eptu party meeting hi thil thlak danglamtu tur a ni tiin,"Chhan pakhat avangin kan kal khawm thei a, kan inzawm thei a ni. BJP sorkarna hnuaia democracy, constitution-in dikna chanvo min pek leh kan zalenna-te humhim turin kan kal khawm a ni," a ti.

Eptu party meeting hi Maharsahtra-a Sharad Pawar-a kaihhruai Nationalist Congress Party (NCP) keh darh lai leh, Bengal-a panchayat inthlan kaihhnawiha mi eng emaw zat an thih avanga Congress leh Left party-te'n Trinamool Congress an dem mek laia neih a ni a, hei hian eptu party-te meeting boruak hi a tidanglam theia rin a ni. Meeting-ah hian hruaitu langsar tak tak, Sonia Gandhi, Mamata Banerjee, Sharad Pawar, Arvind Kejriwal, MK Stalin, Nitish Kumar le Hemant Soren te an tel.