Congress-in UCC chungchangah closed-door meeting nei

Congress president Mallikarjun Kharge thurawn pe tura din, member pariat awmna, advisory group chuan July 15 khan All India Congress Committee (AICC) headquarters-ah pawn lam mi tel lohna meeting an nei.

Meeting-ah hian Uniform Civil Code (UCC) chungchang sawiin, thil tih theih ni mah se, mimal nunphung hrut rualna tur atana dan inang hman chu ṭul an tih rih loh thu an sawi.

Congress hian UCC chuangchanga an ngaihdan hi chiang takin la sawi lo mah se, UCC kalpui dan tur draft en phawt an duh thu an sawi. Advisory group member pakhat chuan,"Thu tawp engmah siam la ni lo mah se, draft hi kan nghak phawt dawn pawh ti mah ila, tun dinhmunah chuan UCC hman hi ṭul kan ti rih lo a ni. 2018-a 21st Law Commission-in report a lo pek tawh ang khan, UCC hi hman kher a ṭul lo a, hman awl tak pawh a ni hek lo. Thil ṭhenkhatah chuan a hnam emaw, a chi anga an tihdan siam ṭhat ngai pawh a awm mai thei, chu pawh anmahni rawn a, an remtihna ngeia siam ṭhat chauh tur a ni" a ti.

Advisory group hruaitu pakhat chuan,"Sorkar hian hnam pakhat chungchang chauh emaw a ti hi a dik lo a ni. Tribal-te hian tihdan phung an nei hrang vek a, BJP thawhpui ṭhin, Shiromani Akali Dal pawhin UCC hman a ṭul lohna chu na takin an lo sawi tawh kha," a ti ve bawk.

Advisory group hi prime minister Narendra Modi-a'n Bhopal-a UCC hman vat a ṭul thu a sawi hnua din a ni a, UCC chungchanga Congress hmalakna leh ngaihdan an siamna tur ngaihtuahtu tur an ni. Member-ah hian P. Chidambaram, Abhishek Singhvi, Sakman Khursid, Manish Tewari, Vivek Tankha leh KTS Tusli te bakah, Odisha aṭanga Lok Sabha member leh tribal hruaitu ni bawk, Saptagiri Ulaka leh Rajya Sabha member, Scheduled Caste (SC) ni bawk, L. Hanumanthaiah te an tel.