Anti-narcotics unit-in ruihhlo Rs. vbc. 2,416 man hal ral

Enforcement leh anti-drug agency hrang hrangte ruihhlo man khawm, Rs. vbc. 2,416 man hu ni-a chhut chu Thawhṭanni khan hal ral a ni.

Ministry of Home Affairs thuchhuahin a tarlan danin, ruihhlo hal ralte hi New Delhi-a regional conference 'Drugs Smuggling and National Security' neih laiin, Narcotics Control Bureau (NCB) leh state tina Anti-Narcotics Task Force (ANTF) ṭangkawpte'n an man, ruihhlo kg. 1,44,000 chu a rualin ram chhung hmun hrang hrangah hal ral a nih thu a sawi.

Sorkar laipui hian India chu ruihhlo laka a fihlim theihna turin 'zero tolerance' policy a kalpui mek. NCB leh ANTF-te chuan June 1, 2022 leh July 15, 2023 inkarah ruihhlo kg. 8,76,554 vel manin, hei hi Rs. vbc. 9,580 man ni-a chhut a ni.

Regional conference neih laia ruihhlo hal ral zingah hian NCB Hyderabad unit man kg. 6,590, bakah state hrang hranga drugs man; Madhya Pradesh-ah kg. 1,03,884, Gujarat-ah kg. 4,277 leh Jammu & Kashmir-a kg. 4,069 te chu a tam zual an ni. Nimina hal ral takte chhiar telin, kum khat chhunga ruihhlo hal ral tawh zawng zawng hi kg. nuai 10, Rs. vbc. 12,000 chuang man a ni.