Eptu party thawkho hming tur I-N-D-I-A; Delhi-ah NDA mega meet neih a ni

Bengaluru-a eptu party-te'n meeting an neih mek laiin nimin khan BJP leh a thawhpui, National Democratic Alliance (NDA) chuan Delhi-ah mega meet nei vein, hei hi party anga an chakna leh theihna lantirna atana an tih a ni. NDA mega meet-ah hian ram chhunga party hrang hrang 38 te chu tel tura sawm an ni.

NDA hian party zawmtu thar neiin, Maharashtra chief minister Eknath Shinde kaihhruai party, Shiv Sena chuan NDA hi an zawm tawh a, NCP phel, Ajit Pawar kaihhruai chuan an zawm bawk. Mega meet-ah hian Lok Janshakti Party (Ram Vilas) hruaitu, Chirag Pawan chu a tel dawn bawk niin an sawi. BJP president JP Nadda chuan eptu party-te chu anmahni hmakhaw ngaiin an inhmu khawm a ni tiin, Rs. vbc. nuai 20 chuang corruption aṭanga an kut an sil duh vang a ni, a ti. Nadda chuan,"Remchanna zawng intel khawm, pawl inpawlhsawp satliah ve tak pakhat mai an ni. Tum leh hmathlir leh sawi tur pawh an nei lo. Thuenihna chan a, anmahni hamṭhatna tur atana ro rel chiah an thlahlel," tiin epu party meeting neih chu a sawisel.

Prime minister Narendra Modi pawhin Port Blair-a Veer Savarkar International Airport hawnna a hmannaah thu sawiin, eptu party meeting chu sawiselin,"Anni tan chuan chhungkua a pawimawh ber a, kan ram chu engmah a ni lo. Eiruk hi an tum a ni." tiin, eptu party-te chu eiru nasa niin a puh.

Hetih lai hian Thawhṭanni aṭanga ṭan eptu party 26-te meeting chu Bengaluru-ah neih chhunzawm a ni a, Thawhṭanni khan inhmelhriatna leh chawhlui kilhona an nei a, nimin khan kal khawmte chuan close-door meeting an nei thung.

Eptute meeting-ah hian kum 2024 Lok Sabha inthlana BJP paih thla tura thawhho dan tur leh an thawhhona tur pawl hmingte an ngaihtuah a ni. Common minimum programme leh rally bakah thil tih khawm reng reng huaihawta ngaihtuahtu tur sub-committee din te pawh an sawi tel nghal bawk.

Eptu party-te hian an thawhhona pawl hming atan hian I-N-D-I-A (Indian National Democratic Inclusive Alliance) tih chu lungrual takin an pawm. I-N-D-I-A hian hruaitu hran an la ruat lo a, Congress chairperson Sonia Gandhi chu pawl President tur atana rin kai ber niin, Bihar chief minister Nitish Kumar chu Convener tura sawi rik a ni bawk.

Congres president Mallikarjun Kharge chuan 2024 inthlanpuia PM candidate tur chu Congress-in an neih leh neih lohah an buai loh thu a sawi a, "Duh leh tum inang eptu party-te hi khawtlangah rorelna dik leh hmasawnna rual tak a awm theih nan kan thawkho dawn a ni," a ti.