Supreme Court-in Rahul Gandhi petition ngaihtuah dawn

Rahul Gandhi-a'n a thubuai stay tura a dilna chu July 21-ah Supreme Court-in a ngaihtuah dawn.

July 7 khan Gujarat High Court chuan Gandhi ngenna hi a hnawlsak a, hemi hnu hian Supreme Court lamah a kal leh a ni.

Intihhmingchhiatna thubuai siamsakah thiam loh chantir a nih hnuah Gandhi hian May 2 khan Gujarat High Court-ah a hremna chu stay rih turin dil mah se, Gujarat High Court hian bail phalna chiah a pe a ni. Gujarat high court thutlukna siamah a lungawi loh avangin Supreme Court-ah hian a kal leh, thiam loh chantir a nihna chu sut tur leh Gujarat High Court thutlukna chu stay turin a ngen.

Supreme Court-a a petition a theh luhah hian Gandhi chuan Gujarat High Court-in kum hnih tang tura hremna a pekah hian thiam loh a chan chhan chu thil chiang lo a ni, a ti. Sawi bik leh tihchhan bik pawh nei loa a thusawi chu, Gujarat MLA, Purnesh Ishwarbhai Modi chuan mi vbc. 13 chuang tihmingchhiaah puhin, complaint a theh lut ta a ni. Intihhmingchhiatnaa inpuhnaah hian mimal emaw, mi ṭhenkhat sawi bik a nei tur a ni a, Rahul Gandhi thusawiah erawh chiang taka sawi bik a nei lem lo.

Petition-ah hian Rahul Gandhi chuan Lok Sabha member aṭanga ban a nih hnuah ni 112 a ral tawh thu leh, thlan tlin a nihna, Wayanad constituency seat chu a ruak reng tih a sawi. Constitution -in Representation of People Act 1951 hnuaia section 151A hmanga dan a siamah chuan MP seat hi thla ruk aia rei a ruak tur a nih loh thu a sawi tel bawk. A aiawh thlan emaw ruat lailawk tal an awm a nih loh chuan a constituency leh party aiawh anga eng thil mah a tihtheih dawn loh thu Gandhi hian a sawi.

Rahul Gandhi hi kum 2019-a Karnataka Kolar district-a political rally neihnaa a a thusawiah Modi tih hming leh rukru tih a sawi zawm avangin a lakah hian intihhmingchhiat thubuai theh luh a ni a, kumin kumtir khan thiam loh chantir a lo ni tawh a ni.