PM Modi-a'n Port Blair airport terminal building thar a hawng

Andaman and Nicobar island-a awm, Port Blair, Veer Savarkar International Airport-a New Integrated Terminal Building (NITB) chu nimin khan prime minister Narendra Modi-a'n video conference kaltlangin a hawng.

Terminal building thar hi artui kawr ang deuh pian neia siam a ni a, he khawmual ram environment entirna anga ngaih a ni. Terminal pumpui hian a chunga skylight an vuah hmangin ni khatah darkar 12 chhung eng a dawng thei dawn a ni.

Airports Authority of India (AAI) chuan passenger an tam tak avangin NITB hi Rs. vbc. 707.73 sengin a siam belh a; sq.metre 40,837-a zau niin, he terminal building thar hian passenger 12,000 a ruala dawl zo leh dawng thei tura ngaih a ni a, kum khatah mi nuai 50 chuang a dawng thei dawn bawk a ni.Terminal building thar hi chhawng thum niin, check-in counter 28 siam a ni a, passenger-te'n thlawhna an luhna tur lei pathum leh conveyor belt pali siam a ni bawk.

NITB hawnna hi civil aviation minister Jyotiraditya Scindia, union minister of state for road, transport and highways and civil aviation, General (retd.) VK Singh leh senior official ṭhenkhatin an telpui a ni.