2024 Lok Sabha inthlanah I.N.D.I.A vs NDA

Bengaluru-a ni hnih awh meeting an neih hnuah eptu party 26 te chuan an thawhhona hming atan I.N.D.I.A (Indian National Developmental Inclusive Alliance) tih an chu an pawm a, kum 2024 Lok Sabha inthlan lo awm tur chu I.N.D.I.A anga hmachhawnho an tum.

Meeting an neih zawha press mite an kawmnaah Rahul Gandhi chuan,"2024 inthlan hi Modi leh I.N.D.I.A inbeihna a ni dawn. NDA leh I.N.D.I.A, Narendra Modi leh I.N.D.I.A rilru insualna a ni ang a, India chuan hnehna a chang ziah ṭhin tih pawh kan hriat kha," tiin a sawi.

July 17 leh 18-a eptu party-te meeting hian I.N.D.I.A thu ken atan Jeetega Bharat (India will win) tih chu an thlang a, hei hi Maharashtra chief minister hlui, Uddhav Thackeray rawtna niin, BJP-te chona atana thlan a ni. West Bengal chief minister Mamata Banerjee chuan press mite hmaah BJP chu choin,"BJP hian I.N.D.I.A hi in el phak dawn em ni? Kan ram hi kan hmangaih a, India hmakhaw ngaitu tak takte kan ni. Loneitute tan te, Dalit tan te, ram puma mi zawng zawng tan leh khawvel tan pawh I.N.D.I.A hian hnehna a chang ang. Kan ram hian hnehna a chang ang a, BJP erawh an tlu ang," tiin a sawi.

NDA pawhin July 18 khan Delhi-ah mega meet buatsaihin, party zawm thar zawng zawngte nen party 39 an tel. He mega meet hi eptu party-te laka an lenna tihlan nana huaihawt an ni.

NDA mega meet-ah hian prime minister Narendra Modi chuan thu sawiin, eptu party intel khawm chu sawiselin, mahni hmasialnain an intel khawm a, an duhamnain pawl hial an siam a ni, a ti."2014 inthlanah khan NDA vote hmuh kha 38% a ni a, 2024-ah, term thumnaah chuan 50% chuang a ni tawh ang a, India pawh ram economy lian pathumna a ni ve tawh bawk ang," a ti. PM hian mega meet kal zawng zawngte bakah NDA zawmtu tharte chu lawmin, NDA chuan phurna thar an neih thu a sawi a,"Kumin hi NDA kum 25 tlinna a ni a, NDA thawhpui tawh zawng zawng leh thawhpui tharte pawh lawmthu ka hrilh che u. NDA chuan midang paih thlak a tum ve lo a, ram tana innghahna tlak nih a tum zawk," tiin, I.N.D.I.A chu hmun ṭhenkhata inngeih, hmun ṭhenkhata inngeih lo party kal khawm mai an nih thu a sawi.

BJP kaihhruai NDA sorkar leh eptu party intel khawm I.N.D.I.A chuan meeting neih zawh phat aṭangin ṭawngkaa inbeihna an ṭan nghal. He pawl pahnihah hian ram chhunga party hrang hrang 65-te tel mah se party dang 11, khawi lam mah la zawm ve lo an awm bawk. Heng party zawm lam nei lote hian belh khawmin Lok Sabha-ah member 91 an nei . YSR Congress party, Andhra Pradesh-a sorkar lai bakah, Odisha-a sorkar lai Biju Janata Dal (BJD) leh, Telangana-a sorkarna siam mektu Bharat Rashtra Samithi (BRS) te chu tel lo langsar zualte an ni a, Mayawati kaihhruai, Lok Sabha-a member 9 nei, BSP pawhin pawl zawm lam an nei lo.