Henley passport index-ah India 80-na

Khawvel ram hrang hrangte passport hlutna teha, an thiltihtheih dan ranking siam ṭhintu, Henley & Partners' chuan kum 2023 3rd quarter atana Henley passport index tichhuakin, India chu passport hlut lama 80-na a ni.

India passport hi kum 2022-ah khan 85-naah awmin, kuminah hian 80-naah a awm. India passport neite chu ram 57-ah visa ngai loin an zin thei tawh dawn a ni. India passport hmang hian heng ram; Thailand, Rwanda, Sri Lanka leh Jamaica-ah te hian visa tel lo emaw thlen hnua visa dil chawpin a zin theih a, mahse, ram 177-ah visa neih hmasak a ngai thung ang.

Ram pakhat passport thiltihtheihna hi ram danga visa ngai loa an zin theih leh theih loh anga ranking siam ṭhin a ni a, kum nga chhung khawvela passport thiltithei/hlu ber ni ṭhin Japan chu kumin hian Singapore-in luahlanin, Japan hi pathumnaah a awm. Singapore passport neite hi visa ngai loin ram 192-ah an zin thei a ni.