Gujarat-ah ruah sur nasain harstna thlen

Gujarat-a Rajkot, Surat leh Gir Somnath district-ahte Thawhlehni khan ruah nasa taka surin, tuilian avanga khaw chhunga tui tling chuan kawngpui chu mihring mal chena thuktein a chim a ni. Tuilian hian hmun ṭhenkhatah chuan motor-te pawh a chim hial a, dawrte pawh khar niin, mi 70 chuang an awmna hmun aṭanga sawn chhuah an ni tawh.

Indian Meteorological Department (IMD) chuan Gujarat-ah hian darkar rei lote chhungin ruah 300mm a tla hman niin an sawi a, hetiang bawka ruah tam hi Saurashtra leh Gujarat chhim lam khaw ṭhenkhatah a sur chhunzawm ve leh dawn niin an sawi bawk.

National Disaster Response Force (NDRF) leh State Disaster Response Force (SDRF) te chu chhiatna nasa zawk thleng thei atana inbuatsaih leh inralring tura hriattir an ni tawh.

State Emergency Operation Centre (SEOC) thuchhuahin a tarlan danin, Gir Somnath district-a Sutrapada taluka chuan ruah sur hi dawng nasa berin, darkar 14 chhungin ruah mm 345 a tla hman niin an sawi a, Dhoraji taluka chuan darkar 14 chhung vek hian ruah mm 250 a dawng ve bawk a ni. Surat-ah pawh nikhat chhung lekin ruah mm104 a sur hman a, Junagadh hmun ṭhenkhatah chuan ruah sur nasa hian nunphung a tibuai ṭan mek bawk.