Parliament monsoon session-ah Manipur chungchang sawiho phut

Parliament monsoon session chu nimin aṭang khan neih ṭan a ni a, ṭan a nih hma hauhin eptu party MP ṭhenkhat chuan adjournment motion pu lutin, Parliament chuan thil dang engmah ti loa Manipur tualchhung buaina chungchang sawiho an phut.

Eptu party-te chuan Manipur tualchhung buaina chungchanga inrawlh a, thu sawi turin PM Modi hi an phut a, eptu MP 10-te chuan adjournment motion an pu lut a ni. Parliament-a Manipur buaina sawi tura nawrna nasa tak hi Manipur-a tribal hmeichhe pahnih, saruaka khawlaia kawng an zawhpui leh an pawngsual nia sawite video darh thar leh vang a ni.

Trinamool Congress hruaitu, Derek O'Brien chuan video message siamin, PM chu house pahniha thusawi tur leh, Manipur buaina changchanga thuchhuah siam a inrawlh vat tura a duh thu a sawi a,"Mann ki Baat chu duh tawk rih ila, Manipur ki Baat tih a hun tawh," tiin a sawi.

Parliamentary Affairs Minister, Pralhad Joshi chuan sorkar chu Manipur chungchang sawiho tura a inpeih tawh thu a sawi a, mi 100 chuang an thihna, Manipur tualchhung buaina chu Parliament-a sawiho turin sorkar chu a inbuatsaih thu a sawi.

Parliament monsoon session hi July 20 - August 11 chhung neih tur a ni a, sitting 17 a awm ang a, Parliament building hluiah session tir lam hi hman a ni ang a, a hnuah building tharah an insawn ang.