Sri Lanka President Ranil Wickremasinghe a rawn zin dawn

Sri Lanka president Ranil Wickremasinghe chuan President a nih aṭanga kum khat hnuah, vawiin hian India-ah a rawn zin dawn.

Dan naranin Sri Lanka President-te hi President an nih aṭanga thla khat hnuah India hi an tlawh ṭhin. Mahse tun ṭumah erawh an ram economy-in harsatna nasa tak a tawh vangin Wickremasinghe hi a rawn zin hma thei lo a ni.

India ram a cham chhungin prime minister Narendra Modi bakah president Droupadi Murmu te a hmu dawn a, ram pahnihten inzawmna ṭha leh inkalpawhna changtlung zawk an neih theih dan turte a sawipui ang. Ram pahnihte hian energy lei leh hralh an tih tawn theihna atan power transmission grid te thlun zawm thu-ah inremna an siam theih an beisei bawk.

Sri Lanka-in sum lama harsatna nasa tak a tawh hnuah, India hian a mamawh hrang hrang leina turin USD tld 4 chuang a pe tawh a ni.