I.N.D.I.A tih hming inphuah vangin eptu party-te lakah complaint theh luh a ni

Eptu party 26-te intel khawmin an thawhhona hming atana I.N.D.I.A tih an thlan hnuah, Nilaini khan Delhi police station-ah an hming inphuah chungchangah complaint theh luh a ni.

Delhi police officer chuan INDIA hming hman dik lohna leh inthlan atana mipui rilru hruai kawi thei tur atana phuah a ni tiin complaint an dawn thu hi a sawi.

Complaint theh luttu zinga pakhat, Dr. Avinish Mishra chuan Emblems and Names (Prevention of Improper Use) Act, 1950-a section hrang hrang ṭan chhanin, tu tan mah INDIA tih hming chu hman phal a ni lo, a ti. "Heng political party-te hian an pawl hming atana INDIA tih an hman avang hian Emblems Act-a section 3-na hi an bawhchhe chiang a, chuvangin, he Act hnuai veka section 5-na hmang hian hrem theih an ni," tiin a sawi.

"Party 26- te hi inthlan hmachhawn tura intelkhawmin, kum 2024 inthlan neih tur atan liau liau an indin a ni. An pawl hming atana INDIA tih an hman hian mipuite rilruah INDIA aiawh leh INDIA chu anmahni anga ngaih theihna tur rilru tuhna turin awmze nei takin an inphuah a ni. Hei vang hian Indian Penal Code, 1860 hnuaia section 171F hmanga hrem theih an ni bawk a ni," tiin Mishra chuan a sawi bawk.

Delhi Deputy Commissioner of Police, Pranav Tayal chuan complaint an dawn thu hi sawi mah se, complaint kaihhnawiha hmalakna engmah an la neih loh thu a sawi tel.