Farm law dodal nan Congress-in ‘Kisan Yatra’ buatsaih dawn

Sorkai laipuiin a pawm tak sawisel hlawh tak farm law pathumte dodal nan Congress party chuan Punjab aṭanga bul ṭanin, 'Kisan Yatra' a buatsaih dawn.

He Yatra hi Punjab-a Sangrur aṭanga bul ṭan tum a ni a, Delhi-ah a tawpna hun hman a ni ang. Punjab leh Haryana-a district tam tak chu he Yatra hian a huam tel dawn a ni. Yatra buatsaih chhan hi ramchhunga loneituten inlungrual taka farm law an duh lohzia an lantirna tur a ni.

Ruahman lawk dan chuan vawiin aṭangin Yatra hi ṭan tum a ni. Bul ṭanna hmun tur Punjab-a Sangrur-ah hian party hruaitu Rahul Gandhi chuan mipui kalkhawmte hnenah thuchah a sawi dawn. Hemi hnu hian Patiala-ah Yatra hi chhunzawm zel a ni ang. 

Rahul hian Punjab leh Haryana hi a tlawh dawn niin Haryana Congress President Kumari Selja chuan a sawi. 

Congress chuan ramchhunga lonei­tute dikna leh chanvo humhim nan theihtawpin an bei zel dawn tih an sawi. Party interim president  Sonia Gandhi chuan farm law thar pathum hi dan ṭha lo, 'black law' a ni  tiin, Congress sorkarna state-ah chuan heng dante hi hmang ve lo turin a chah. 

Farm law pathum an dodal tur hi thla liam ta September thlaa Parliament-in a pass a ni a, chungte chu Farmers` (Empowerment and Protection) Agree­ment of Price Assurance and Farm Services Bill, 2020, Farmers` Produce Trade and Commerce (Promotion and Facilitation) Bill, 2020 leh The Essential Commodities (Amendment) Bill 2020 a ni. September 27 khan president Ram Nath Kovind chuan a pawm fel bawk.