Babri mosque tichhetua puh mi 32 thiam chan tir

Kum 1992 December 6-a Ayodhya khuaa Babri mosque tihchhiatnaa mawhphurtua puh mi 32-te chu Nilaini khan Uttar Pradesh-a special CBI court chuan thiam lohna an nei lo tih a tarlang. 

Court chuan Barbi mosque kha ruahman lawknaa tihchhiat a nih loh thu tarlangin, thiam a chantir zingah hian BJP hruaitu LK Advani, Murli Manohar Joshi leh Uma Bharti pawh an tel. 

Special judge Surendra Kumar Yadav chuan heng mi 32 te laka CBI-in audio leh video evidence (finfiahna) a neihte chu conspiracy charge siam turin finfiahna ṭha a tlin loh thu leh audio phei chu ṭawng hriat ṭhat theih loh khawpa chhia a nih thu a sawi a ni. Heng mite hian mosque tihchhiat tur kha an dang zawk a ni, a ti. Court chuan Babri mosque hi anti-social element, 'Kar Sevak' tihchhiat a nih thu a sawi. 

Nilainia court-in thubuai a ngaihtuah lai hian an puh ho zawng te hi an kalkim thawkhat hle a, mahse deputy prime minister hlui LK Advani, tihchhiat a nih hun laia Uttar Pradesh chief minister Kalyan Singh, union minister hlui Murli Manohar Joshi leh Uma Bharti, Ram Janmaboomi Teerth Kshetra Trust president, Nritya Gopal Das leh Shiv Sena hruaitu Satish Pradhan-te chu  mimal thil pawimawh vangin court-ah an inlan ve lo.

Uttar Pradesh-a Ayodhya khuaa Babri Masjid awmna hmun hi Hindu hoin an pathian, Ram pianna hmun niin an chhal a, hei vang hian kum 1992, December 6 khan India ram hmun hrang hrang aṭanga Hindu kulmuk ho kalkhawm chuan kum zabi 16 hunlaia sak, Babri Maasjid hi an vawchhia a ni. Hindu leh Muslim inkarah buaina nasa tak chhuak zuiin, mi tam takin an thih phah bawk.

Nikum November 9 khan Supreme Court chuan Ayodhya-a Hindu leh Muslim te ram inchuh thubuai chu a rel fel a; an ram inchuh, kum 1992-a Muslim moque tihchhiat tak awmna hmun, ram acre 2.77-a zau chu Hindu Lord Ram temple sakna atan a pe a, hemi rual hian Ayodhya-ah mosque sakna tur ram acre 5-a zau chu Sunni Waqf Board hnena pe turin sorkar laipui a hriattir nghal bawk. Ayodhya-a Ram temple sakna tur hian thla thum chhung ngeiin trust din turin a ti bawk a, anni hian temple sak hna hi an bawhzui mek a ni.