Manipur-a buaina chhuak avangin Parliament inkhawm titawp

Parliament monsoon session ni hnihna, nimina neihah Manipur tualchhung buaina thleng mek chungchangah prime minister Narendra Modi chu thu sawi tura phuta eptute member-te an au buai avangin, Parliament in hnihnah rorel thei loin inkhawm tihtawp a ni.

Prime Minister Modi hi May 3 aṭanga Manipur tualchhung buaina thleng chungchangah a ṭawng chhuah loh avangin eptu party-te hian a hma aṭangin vawi tam tak sawiselin, tawng chhuak turin an lo phut fo tawh a ni. Buaina chhuah aṭanga ni 77 hnu, hmeichhe pahnih chunga rawng taka chetna video a darh hnuah chiah PM hi Manipur chungchangah a ṭawng chhuak.

Video a darh hnu hian eptu chuan PM Modi leh BJP sorkar chu na zawkin an bei chhunzawm leh a, session neih mekah pawh hei hi an buaipui chhoh zel a rinawm.

Eptute hian Lok Sabha-ah Rule 193 hnuai leh, Rajya Sabha-ah Rule 267 hnuaiah Manipur chungchang sawiho an phut a ni. Lok Sabha-ah a tirah chawhnu dar 2 thleng inkhawm tihtawp a ni a, mahse, a hnuah Manipur chungchang avanga eptute an au buai chhunzawm zel avangin nileng atan tihtawp zui a ni. Rajya Sabha-ah pawh chawlh lailawk hnuah pawh eptute'n Manipur chungchang sawiho an phut avangin inkhawm tihtawp a ni zui ve bawk.

Session ṭan ni, Ningani ah pawh Manipur chungchang avangin rorel thei loin House pahnih inkhawm tihtawp a lo ni tawh bawk.