Rajya Sabha panel of vice-chairperson-ah hmeichhe 4 ruat belh

Rajya Sabha chiarman Jagdeep Dhankhar chuan hmeichhiate'n mipate nena intluktlanna an neih theihna tur atan panel of vice-chairperson-ah hmeichhe pali a ruat belh. Panel of vice-chairperson-ah hian monsoon session ṭan hma thleng khan mi pariat an awm sa a ni.

Panel member ruat thar zingah hian Nagaland aṭanga Rajya Sabha member atana thlan tlin hmasak ber, S. Phangnon Konyak chu a tel. Ani bakah hian ruat member, P.T. Usha, BJD mi, Sulata Deo leh NCP party mi Fauzia Khan te ruat an ni bawk. Fauzia Khan leh PT Usha te hi panel din hmasak zawkah pawh khan an lo tel tawh a ni. Panel-a mipa tel zingah hian Congress party mi L. Hanumanthiah, Trinamool Congress aṭangin, Sukendu Shekhar Ray leh BJP mi Ghanshyam Tewari te ruat an ni bawk.

Rajya Sabha panel of vice - chairperson hi Rajya Sabha Chairman leh Vice-Chairman an awm loh palh a Chairman chanvo la thei tura ruatte an ni. Rajya Sabha-ah hian hmeichhia leh mipate'n intluktlanna an neihna tur atana women's reservation bill, 1996-a put luh tawh chu vawiin thlengin pass a la ni lo thung.