Rahul Gandhi petition ngaihtuahtu tur Justice BR Gavai

Congress party hruaitu Rahul Gandhi-a'n intihhmingchhiat thubuaia thiam loh chantir a nih chungchang 'stay' tura a ngenna chu Supreme Court chuan a remtihsak tawh a, a petition ngaihtuah tur hian Justice BR Gavai kahhruai bench chu ruat a ni. Gujarat High Court chuan Gandhi-a ngenna hi lo hnawlsak tawh a ni.

Gandhi petition file-tu, advocate Prasanna S. chuan Gujarat-a lower court chuan political campaign neihnaa politics chungchang sawinaah ram sum leh pai dinhmun sawi kai a ni a, heta hming lam rikah hian Modi tih a tel avangin prime minister Narendra Modi sawina emaw tiin Rahul Gandhi hi thiam loh a chantir mai a ni, a ti. Court thutlukna hi intihhmingchhiat thubuaia thiam loh chantir dan dik a ni lo a, thiam loh chang tur chuan mimal intihhmingchhiatna a nih a ngai tiin a tarlang.

Prasanna chuan,"Politics thil sawinaa Modi hming lam tel chu Prime Minister Modi hming tihbawrhbanna anga ngaih a nih dawn a, hremna sang ber pek a nih dawn chuan, court thutlukna hi mimalin a duh sawi tura zalenna a neih rehbehsakna a ni ang. Campaign-na reng rengah politics chungchang emaw, sawiho theih thil a awm tawh lo ang a, insawiselna ni miah lo pawh sawi ngam a ni tawh lo ang," tiin petition-ah hian a ziak bawk.

Gandhi hian hremna pek a nihna chhan, 2019 Karnataka campaign-a a thu sawiah Modi tih hming rukru nena a sawi zawm chu tihbik nei emaw, mimal anga tu mah a sawi loh thu a sawi. A thusawi avang hian Gujarat BJP MLA, Purnesh Ishwarbhai Modi chuan Gandhi lakah hian intihmingchhiat thubuai a theh lut a, Gujarat court chuan Gandhi hi thiam loh chantirin kum hnih tang turin a hrem. Hei hi defamation law-a inhremna pek theih na ber a ni. Thiam loh chantir a nih hnuah, Lok Sabha member a nihna pawh hlihsak a ni nghal bawk a ni.