Maha-a leiminah mi 27 thi, chin hriat lohin mi 81 la awm

Maharasthra-a Raigad district-a leimin nasa tak thleng vanga thi chu mi 27 an tling tawh a, chin hriat lohin mi 81 an la awm mek bawk.

Mumbai aṭanga km 80 vela hla, Irshawaldi khuaah hian kar liam ta Nilaini zan khan leimin rapthlak tak hi a thleng a, chenna in 17 vel a chhilh a ni.

National Disaster Response Force (NDRF) leh agency dangte chuan nimin thleng khan leiminna hmuna hian chhanchhuah hna an la thawk a ni. Leiminin a chilh ruang 27 an la chhuak tawh a, an zinga mi 12 chu hmeichhia niin, naupang pali an tel bawk. Ruang an hmuh tawh zingah hian chhungkaw khat ami, member pakua an tel a ni.