Manipur buaina avangin Parliament rorel khaihlak chhunzawm zel

Manipur tualchhung buaina thleng leh, Meitei hoin Kuki hmeichhe pahnih saruaka kawng an zawhpuina video darh leh thah an nih chungchangah central-a sorkar mek, BJP chuan beih a tawk chhunzawm zel.

July 20 aṭanga ṭan, Parliament monsoon session pawh eptu party-te'n thil dang sawi loa Manipur buaina chungchang sawiho an phut avangin rorel thei loin a la khaihlak zel. Eptu MP-te hian parliament in hnih, Lok Sabha leh Rajya Sabha-ah Manipur buaina sawiho an phut a, sawiho a nih loh chuan session adjourn turin ṭwangkam na takin lehkha an theh lut bawk. Ni thum chhung chu Parliament inkhawm hi rorel thei loin tihtawp a ni tawh.

Eptu intel khawm, I.N.D.I.A MP-te chu nimin khan Gandhi lim bulah kalkhawmin PM Modi chu Manipur buaina chungchanga ṭawng chhuak turin an phut leh.

BJP chuan Manipur buaina chungchangah hian Parliament-ah union home minister Amit Shah-a'n thu a sawi ang an ti a, sorkar pawh sawihona nei tura a inpeih tawh thu leh eptute zawk chu a tlanchhe zawkah an ṭan leh ṭhin thu an sawi. Hetih lai hian eptute'n Manipur chungchang sawi tura hun rei zawk pek an phutna chu BJP hruaitute hian an pawm theih leh theih loh an la sawi chiang lo thung.

Eptu party-te hian thil dang zawng zawng dah ṭhaa nilenga Manipur dinhmun sawiho an phut a, sorkar lamin rei tak sawiho rem a tih si loh avangin house chhungah hian rorel theih lohin eptu party MP-te chu an au rual a ni. Rajya Sabha-ah chuan rule 267 hmangin Manipur chungchang sawi tura hun rei zawk pe tur hian lehkha theh luh a ni a, sorkar erawh chuan rule 176 hnuaiah rei lote chauh sawihona hun nei thei an nih thuin a chhang thung.

Rule 267 hnuaiah hian Rajya Sabha MP-te chuan Chairman pawmpuinain session neih hmaa thurel tur awm sate chu rel rih lo turin a thlen thei. Mahse sorkarin rule 176 hmanga sawihona hun rei lo zawk hman a tum tlatna hi Manipur-a an mualphona leh an dik lohna sawi chhuah tur an ven duh vang niin a ngaih theih thung.