Varanasi Gyanvapi mosque-a scientific survey neih tur dang rih

Uttar Pradesh-a Varanasi khuaa mosolman sakhaw hmun, Gyanvapi mosque chu mosque management committee-te'n Supreme court-ah petition an theh luh mek laiin, Varanasi district court thupek angin Archaeological Survey of India (ASI) chuan scientific study nei turin nimin aṭang khan inspection an nei ṭan.

Hetih lai hian mosque management committee-in zir chianna neih duh loa petition an theh luh hi nimin vek khan Supreme court chuan a ngaihtuah a, ASI chu July 26, tlai dar 5 thleng engmah ti rih lo tura thu pein, Allahabad high court pawh an thupek chhuah sut rih a, mosque management committee-in thu an theh lut a nih chuan, dan ang taka lo ngaihtuah turin a ti bawk. Supreme court chuan mosque committee chu July 26 thleng Varanasi district court thupek an stay tur thu leh, chumi chhunga Allahabad high court-a petition siam turin a hrilh.

Gyanvapi mosque hi Hindu temple tihchhiat a nih hnua din a ni tiin helai hmuna Hindu hmeichhe palite chu court-ah an zualko a ni. An thu theh luh hi court-in a ngaihtuah hnuah Zirtawpni khan Varanasi district court chuan mosque inspection nei tur hian phalna a pe chhuak a, thil nihna dik tak hre turin scientific study neih chu a ṭul a ni, a ti.

Heng hmeichhiate vek hian 2021 khan Gyanvapi mosque chungchangah hian petition an lo theh lut tawh a, an petition-ah hian kum tluana mosque tlawh theihna hi an dil a ni. Gyanvapi case-a Hindu lam ṭang, Subhash Nandan Chaturvedi chuan court thutlukna chu lawmawm a tih thu a sawi a,"Gyanvapi mosque ASI zir chiantir tura kan ngenna chu a hlawhtling a, hei hi thil thlak danglamtu tur a ni," tiin a sawi. Supreme court hian May thla khan Gyanvapi mosque scientific study nei a, mosque chhunga 'Shivling' an tih, nikuma video pakhat hmanga an hmuh carbondating neih tura dilna chu a lo hnawl tawh a ni.

Petition theh luttute'n mosque chhunga mi chu Shivling ngei a ni tia zir chian dilna an thlen hi Allahabad High court chuan zir chiang turin thupek a chhuah thung. Gyanvapi mosque thuneitute erawh chuan Shivling anga an ngaih chu wazukhana fountain siamtu pakhat, Muslim-te'n Namaz an hman hmaa an insilfaina ṭhin a ni, tiin an sawi thung.

Varanasi-a Gyanvapi mosque hi prime minister Narendra Modi-a constituency niin, Hindu sakhaw zuitute'n Hindu temple tihchhiat chunga sak nia an hriat mosque tam tak zinga pakhat a ni a, BJP-te'n 1980 leh 1990 inkara Ayodhya leh Mathura tih loha temple-mosque buaina an sawi pathum zinga pakhat a ni.