Pakistan spy hnena thuruk petu sipai pakhat thiam loh chantir

New Delhi-a Pakistan embassy hnathawkte hnena India hmar lama sipaite chet dan thuruk petu nia hriat, sipai pakhat chu Army court chuan kum 10 leh thla 10 lung in tang turin a hrem.

Sipai thiam loh chantir tak hi New Delhi-a High Commission for the Islamic Republic of Pakistan-a thawk, Pakistan mi, Abid Husain alias Naik Abid nen an inbe pawp nia sawi a ni. India sipaite chet velna thuruk a pek zingah hian a duty-na hmuna guard duty tura ruatte hming bakah, ama kal velna pawh a hrilh bawk.

Thu pawimawh pek chhuah tur nei lo mah se, Army chuan hetianga chetna hi an ngaidam thei lo a, a chet dan mila hremna na ber an pek thu an sawi. A chunga awm sipai hotute hnen aṭanga an thu lak dan a zirin a hremna pawh la danglam thei a nih thu an sawi bawk.