Parliament-ah NDA sorkar rin tawk lohna put luh a ni

Cenral-a BJP kaihhruai, National Democratic Alliance (NDA) sorkar rintawk lohna, 'no confidence' motion chu nimin khan Congress MP Gaurav Gogoi chuan Parliament-ah a pu lut.

MP Gogoi motion put luh hi Congress MP bakah eptu party MP dang 50-te'n an thlawp avangin Lok Sabha Speaker chuan house-a sawiho leh vote thlak theih turin a pawm. Mahse sawiho hun tur hi ruat a la ni lo thung. Congress bakah hian Congress thawhpui, I.N.D.I.A MP te chuan an thlawp vek bawk a ni.

Parliament in hnih, Rajya Sabha leh Lok Sabha-ah hian Monsoon session ṭan a nih aṭangin Manipur buaina chungchang sawiho chu eptu party-te'n an ngiat reng a, mahse, sorkar lamin session-a rel tura ruat sa sawiho phawt a duh avangin rem a ti lo thung. Hei vang hian July 20-a session neih ṭan a nih aṭangin rorel thei loin eng emaw chen an awm.

Manipur tualchhung buaina boruakin India a tuam mek laia sorkar laipui hmalakna beitham an tih avang leh, prime minister Narendra Modi a ṭawng chhuak duh lo chu eptu party-te hian sorkar rintawk lohna put luhna tlingah ngaiin, no confidence motion hi an pu lut ta a ni.

Eptu party-te'n Rajya Sabha-a Manipur buaina sawiho phuta an nawrnaah, AAP MP Sanjay Singh chu rorelnaa tel chhunzawm thei loin suspend a ni a, hei vang hian eptu MP-te chuan Thawhlehni zan khan nawrh an lo huaihawt bawk. Nawrhnaah hian "I.N.D.I.A for Manipur' tih placard-te an keng a ni.

No confidence motion hi Bharat Rashtra Samithi (BRS) chuan a hranin an theh lut ve bawk a, anni hian MP pakua an nei.

Union home minister Amit shah chuan,"Manipur chungchang sawi tur hian sorkar hi a inpeih reng a, party dangte ngaihdan pawh lak a duh a ni. India rama party zawng zawngte hi Manipur buaina chingfel tura kan kal khawm theih ka beisei," tiin Twitter kaltlangin eptu party-te a hrilh. Shah hian,"Multi-State Cooperative Society (Amendment) bill chu kaa chhanga vote lain pass tawh a ni. An thu ken lo aupuiho hi chuan sawihona emaw, cooperative lam an ngaihtuah chuang lo, Dalit an ni emaw, hmeichhia pawh ni se," tiin, eptute lo au bengchheng chu ṭul lo a tih thu a sawi zui.

Eng nge no confidence motion?

No confidence motion hi eptu party-te'n sorkar lai an rin zawh lohna lantir a, sorkar chhunzawm thei tawh lo tura an paihthlak theihna a ni. Sorkar paihthla zo lo tura ngaih pawh ni se, eptu lamin sorkar rorelna an rin tawk lohzia lantirna atana hman a ni bawk a, sorkarna chelh mektute tihdik loh leh sorkar chhunzawm tura an tlak tawh lohna sawina hun atan pawh hman a ni.

Lok Sabha member ni tawh phawt chuan no confidence motion hi house-ah hian an pu lut thei a, mahse member 50 talin an thlawp a ngai thung. Rajya Sabha-ah put luh theih a ni lo a, Lok Sabha-ah chauh put luh theih niin, Lok sabha rule 198(1) leh 198(5) hmanga put luh tur niin, Lok Sabha Speaker-in sawiho tura a pawm ve leh a la ngai a ni.

No confidence motion hi house rorel ni ah, ziaka Speaker hnena theh luh tur a ni. Speaker hian motion sawiho hun tur a ruat ang a, sawiho hun chhung tur pawh speaker thu a ni. Sawihona neih a nih zawhah vote lak tur a ni a, member tam zawkin an duh a, motion pass a nih chuan sorkar lai chu an inhnuhdawh a ngai. Motion hi pass a nih loh erawh chuan sorkar lai chuan rorelna an chelh chunzawm thei thung ang.

India zalen hnuah no confidence motion hi Lok Sabha-ah hian vawi 27 put luh a lo ni tawh a, a hnuhnung ber chu kum 2018-a Narendra Modi sorkarah khan put luh a ni.

Tunah hian Lok Sabha seat 543 awmah BJP leh a thawhpuite, NDA hian seat 331 an nei mek a, eptu party intel khawm, I.N.D.I.A hian seat 144 a nei thung.