Kargil Vijay Diwas: PM leh Defence Minister te'n Kargil war-a sipai thite zahna hlan

Kargil war-a India chakna hriatrengna atana kum tin July 26-a hman ṭhin, Kargil Vijay Diwas chu nimin khan hman niin, prime minister Narendra Modi leh defence minister Rajnath Singh te'n he hun hi hmanpuiin, sipai nunna chante zahna chibai an buk.

PM Modi chuan,"Kargil Vijay Diwas hian India sipai huaisen tak takte a rawn pho chhuak a ni. Anni hi India mipui zawng zawngte tana chona siamtu leh tiphurtu an ni reng tawh ang," tiin a Twitter-ah a tarlang.

Rajnath Singh chuan Kargil war memorial tlawhin, zahna chibai bukin pangpar a dah a, "India fa hrin huaisen, mahni ram ven nana nun hlan ngamte chibai ka buk a che u. Mahni sahimna aia ram tana che chhuak ṭhinte chibai ka buk duh che u," tiin a sawi.

Kum 1999 khan Pakistan sipaite chuan a rukin India leh Pakistan inri-na, Line of Control (LoC) kanin, Ladakh hmun ṭhenkhatah bu an khuar a, Ladakh leh Kargil aṭanga Srinagar panna kawng an dang chat bawk. India sipaite chuan 'Operation Vijay' puangin Pakistan sipai, India ram chhunga bu khuar mekte bei letin thla hnih chuang zet an inkap a ni. Pakistan lam chu tawlh kirin, India sipaite chuan hnehna an chang thei ta a ni. Pakistan hneha India chakna hi Kargil hmuna thleng a nih avangin Kargil Vijay Diwas (Kargil Victory Day) hi hman ṭhin a ni ta a ni.