Eptu MP-te'n lungawi lohna lantir nan thawmhnaw dum ha

Eptu MP-te chuan Manipur buaina chungchanga an lungawi lohna lantir nan nimin khan thawmhnaw dum an ha. I.N.D.I.A-a tel party MP-te chu Opposition leader, Mallikarjun Kharge chamber-ah inhmu khawmin Parliament in hniha an hmalak dan tur relin an ṭhu khawm bawk.

Thawmhnaw dum an hak chhan hi house-a Manipur buaina chungchang sawihona hun siam a nih loh avang leh, prime minister Narendra Modi-a'n Parliament in hniha he buaina chungchang engmah sawi loa a la awm thei chu an duh lohzia leh lungawi lohna lantirna atan a ni.

Eptu party hruaitute hian Lok Sabha-a Speaker-in no confidence motion a pawm tawh chuan thil dang engmah tih leh sawiho a rem tawh lo tih an sawi. Tihdan phung pangngaiah chuan no confidence motion hi pawm a nih tawh chuan thil dang engmah ti lo a, motion sawiho phawt chu tihdan tur an nih thu an sawi a ni.

Manipur buaina chungchang sawiho phutin eptu MP-te hi parliament-ah nitin an la au buai reng. Nilaini khan eptu party-te aiawhin Congress MP Gaurav Gogoi chuan no confidence motion hi Lok Sabha-ah a pu lut a ni. No confidence motion sawiho hun tur chungchangah hian, Speaker Om Birla chuan party zawng zawngte hruaitu rawn chunga la ruat ṭhat tur a nih thu a sawi.