India ram hmun hrang hrangah ruah sur nasa leh tui lian tuar

India ram hmun hrang hrangah state tam takin ruah sur nasa an tuar a, hei hian lui tui tilianin hmun tam takah chuan khaw chhunga mihring chennaah tui tling a siam a, nunphung a khaihlak nasa hle.

Himachal Pradesh-ah chuan ruah sur hian ziaawm lam a la pan thei lo. India Meteorological Department (IMD) chuan Himachal Pradesh-a district pakuaah ruah nasa tak sur tura ngaih a nih avangin 'orange alert' a puang. IMD Shimla hotu, Surender Paul chuan,"Shimla, Solan, Sirmaur, Mandi, Bilaspur, Kangra, Chamba, Hamirpur leh Una district-ah te ni thum chhung atan orange alert kan puang a, ruah hi nasa zawka eng emaw chen a la sur rin a ni," tiin a sawi.

Maharashtra hmun hrang hrangah pawh ruah a sur nasa a, Mumbai-ah chuan nimin aṭang khan school leh college zawng zawng khar rih tur a nih thu Municipal corporation chuan a hriattir. Hei hian private bakah, sorkar sikul, primary aṭanga college thlengin a huam. Mumbai hmun ṭhenkhatah chuan nimin khan orange alert puan a ni ve bawk. Maharashtra-a Kolhapur district-a Panchganga lui chim chin chuan a him chin a pel tawh niin an sawi a, lui kama khawsa, khaw paruk-a chengte chu hmun him lama insawn tura hriattir an ni tawh bawk.

Nagpur-ah chuan ruah surin tui a tihlen avangin Narendra Nagar Railway Under bridge leh airport kawng khar rih a ngai a ni.

Karnataka-ah chuan ruah sur nasain chhiatna a thlenah mi 38-in nunna an chan tawh tih chief minister Siddaramaiah chuan a sawi. Ruah sur leh tui lian chungchanga an state dinhmun leh hmalak dan tur sawi hian CM chuan official ṭhenkhat meeting neihpuiin, chhanchhuahna leh chhawmdawl hna thawk vat turin a hriattir.

Telangana-ah pawh ruah sur nasa vang Godavari lui a lian a, lui kama awm chhungkaw 790 zet chu sawn chhuah an ni tawh tih District collector, Priyanka Ala chuan a sawi. Telangana-ah hian Moranchapalli khua chu tuiin a chim pil ṭep tawh a, nimin zing khan he khuaa chhungkaw tam tak chu kalna tur nei tawh loin, tuiin a la chim loh, anmahni in chungah leh thingkungah te an awm hlawm a ni. He khaw dinhmun hriat a nih hnu hian NDRF chuan chhanchhuah hna an thawk nghal. Medak district-ah chuan darkar 24 chhung ruah nasa tak a sur avangin hmun tam takah kawng khar a ni a, Siddipet district chuan ruah mm 162 dawng tawhin, Koheda distrcit-ah pawh ni rei lote chhungin ruah mm 118 a tla hman a ni. Mutyamdhara waterfall-a tui lian avanga tang, khualzin 160 te pawh NDRF-in an chhanchhuah tawh thu an sawi. Hyderabad-ah chuan thuneitute'n red alert puangin, ruah nasa zawk a la sur chhunzawm dawn niin an sawi.